Presidenti i KOKSH-it, Fidel Ylli, i kërkoi kryeministrit Edi Rama që të rihapen kompanitë e basteve. Sipas tij, kompanitë e basteve po gëlojnë në “errësirë”, duke mos paguar taksa, s’kanë të punësuar dhe nuk japin para për shtetin. Ai kërkoi rihapjen e kompanive të basteve në vendin tonë, në mënyrë që të ardhurat që qarkullojnë nga ky aktivitet në mënyrë të paligjshme, të shërbejnë për sportistët.
“Ne duam që fëmijët të largohen nga veset e këqija, nga duhani dhe droga. Do të kemi një vend që të krenohemi. Sepse është ulur shumë lindja sot. Duam që të rinjtë të mos largohen nga vendi, por të qëndrojnë këtu. Unë jam i pakënaqur përsëri. Do të lutesha zoti kryeministër, nxirri nga errësira kompanitë e basteve që po gëlojnë.
Që me ato para të bëjmë një qendër tjetër olimpike. Për të bërë dhe shumë qytete të tjera të Shqipërisë. Ne nuk mund të kërkojmë lëmoshë të buxhetit të shtetit. Unë kam qenë në Parlament, dhe e di si ndahet buxheti i shtetit. Por ne kërkojmë burime të tjera alternative që i merr sot errësira. U bë mirë që u mbyllën, sepse kam qenë në Parlament dhe e kam votuar. Ishin bërë si kërpudha pas shiut.
Por ka ardhur një moment që duhet bërë një studim. Kompani bastesh ka e gjithë bota e qytetëruar. Po ne kaq të pasur jemi që i lëmë këto para në rrugë?! Ne nuk mund të rrimë me atë pallat sporti që kemi sot. Duhet bërë një pallat modern. Duhet bërë fusha olimpike në të gjithë Shqipërinë, dhe ju do shikoni në fund të vitit tjetër se çfarë efekti do të ketë”, tha Fidel Ylli.
