Udhëheqësi komunist i Kubës, Fidel Kastro, është lideri i tretë më jetëgjatë në botë, pas mbretëreshës së Britanisë së Madhe dhe mbretit të Tajlandës. Ai u ngjit në pushtet pas revolucionit marksist të vitit 1959, dhe qeverisi vendin deri në vitin 2006, kur për arsye shëndetësore ia kaloi pushtetin të vëllait, Raul. Kastro shtetëzoi të gjithë kompanitë amerikane
në ishull, u armiqësua me Uashingtonin, dhe u bë një aleat i ngushtë i Bashkimit Sovjetik. Amerikanët u përpoqën me të gjitha mënyrat ta rrëzojnë nga pushteti, por pa sukses. Kastro pretendonte se i kishte mbijetuar plot 634 atentateve për ta vrarë atë, kryesisht nga CIA amerikane, emigrantët kubanë, si dhe mafia amerikane. Edhe pse ndërroi jetë në nëntorin e
2016-ës, ai mban ende sot rekordin për fjalimin më të gjatë të mbajtur ndonjëherë në Kombet e Bashkuara:4 orë dhe 29 minuta më 26 shtator 1960. Ndërkaq fjalimin më të gjatë e ka mbajtur më 24 shkurt 1998 në Havanë 7 orë e gjysmë, kur u rizgjodh për një tjetër mandat 5-vjeçar si president.
Juan Sançez, ish-truprojë e Kastros, shkruan në librin e tij “Jeta e dyfishtë e Fidel Kastros”, se udhëheqësi komunist ishte tejet hakmarrës dhe delirant. Ndërsa u bënte thirrje qytetarëve të tij të varfër për sakrifica revolucionare, vetë jetonte në mes luksit, me një ishull privat, një jaht, dhe 20 shtëpi në të gjithë ishullin.
