168 milion fëmijë në botë punojnë, prej të cilëve 85 milionë në punë të rrezikshme, raporton “Save the Children”.
Sipas indeksit “Fundi i Fëmijërisë”, sa i përket vendit tonë, për periudhën kohore 2011-2016, 8.3% e fëmijëve janë jashtë sistemit arsimor të ulët dhe të mesëm.
Në raport, thuhet se shumica e fëmijëve shqiptarë janë të angazhuar në sektorin bujqësor, por edhe në sektorët e tregtisë, industrisë minerale dhe hoteleri-turizmit, ka një numër të konsiderueshëm të fëmijëve që punojnë.
Në vitin 2015 , liderët botëror bënë një premtim, se deri në vitin 2030 fëmijët e gjithë botës do të ishin në shkollë, të mbrojtur dhe të shëndetshëm.
Sipas indeksit “Fundi i Fëmijërisë”, pavarësisht se ky premtim është ambicioz, është i arritshëm nëse qeveritë investojnë tek çdo fëmijë për të garantuar që ata të gëzojnë një fëmijëri të plotë, ashtu siç e meritojnë.
Në raport thuhet se, 1 në 6 fëmijë të moshës shkollore në mbarë botën është aktualisht jashtë sistemit shkollor. Sakaq, 1 në 80 fëmijë largohet nga shtëpia i detyruar nga konfliktet si pasojë e ekonomisë së dobët.
