Në Komisionin e Ligjeve kanë vijuar debatet për dekretet e Presidentit Meta. Pasi është rrëzuar dekreti i Presidentit Ilir Meta për kthimin e ligjit për vetëqeverisjen vendore, fjalën e ka marrë edhe deputeti Andi Përmeti. Ai u ndal në lidhje me skandalin me faturat e luksit, ku thekson se vetëm një natë ka kushtuar 700 euro për zyrtarët e lartë.
“Shpërdorimin për luks të parave publike në rastet kur një person që ushtron funksione publike zgjedh të paguaj 700 euro nata në një hotel nga taksat e shtetit me të varfër në botë. Kaq i detyrohemi taksapaguesve?”, është shprehur Përmeti.
Menjëherë ka ndërhyrë Gjonaj, e cila i ka kërkuar deputetit të mos bjerë pre e lajmeve të rreme.
DEBATET
Andi Përmeti: Ndryshimet në Kodin Penal kanë qenë ndryshime pozitive. Është bërë një pune e madhe për një kod i cili s’ka lidhje me politikën. Unë personalisht kam propozuar disa ndryshime/përmirësime të neneve, të diskutuara me Znj. Xhina dhe Znj. Hysi. Unë besoj që është bërë një pune e mirë për të rritur mbrojtjen juridike ndaj qytetarëve shqiptar.
Por për të qenë i sinqertë dhe në rregull me ndërgjegjen time, po të kthehesha pas do te bëja edhe një tjetër propozim, do te propozoja: Shpërdorimin për luks të parave publike në rastet kur një person që ushtron funksione publike zgjedh të paguaj 700 euro nata në një hotel nga taksat e shtetit me të varfër në botë. Kaq i detyrohemi taksapaguesve?
Etilda Gjonaj: Ftoj Përmetin te mos bie pre e lajmeve të rreme. Përmeti të ftoj të bëhesh pjese e grupit të punës për Kodin Penal, dhe të jap rekomandimet.
Prokuroria e Tiranës do të nisë verifikimin për akuzat që janë bërë në media, dhe më tej mund të nis dhe hetimin për faturat e luksit ndaj ministres së Drejtësisë. Për një natë qëndrimi në Romë, ministrja e Drejtësisë ka paguar 700 euro.
Sipas faturave, në udhëtimet e punës gjatë vitit 2018 deri në qershor të vitit 2019, ministrja Gjonaj ka qëndruar në hotele luksoze me çmime që e kalojnë shifrën 700 euro nata. Kostot e biletave me të cilat fluturon ministrja e Drejtësisë rezultojnë më të shtrenjta, sesa biletat që një individ i thjeshtë mund t’i rezervojë online.
