Familja e pilotit që ishte duke drejtuar avionin që u rrëzua një muaj më parë, ku në bord ishte dhe futbollisti Emiliano Sala bëri apel për ndihmë financiare që të mos ndaleshin kërkimet. Trupi i Sala u gjet në rrënojat e avionit vetëm dy ditë më parë, ndërsa nga piloti David Ibbotson nuk është gjetur asnjë shenjë.
David Ibbotson, 59 vjeç, po transportonte Sala nga Nantes në Cardiff, pasi sulmuesi kishte firmosur me këta të fundit për një shifër rekord prej 17 milionë eurosh, por aeroplani u rrëzua në det pranë Alderney më 21 janar.
Trupi Sala u gjet pas një kërkimi të financuar privatisht, por piloti nga Lincolnshire ende mungon. Familja e pilotit, e shkatëruar hapi një faqe për mbledhjen e fondeve për të rifilluar kërkimin. Të shumtë kanë qenë ata që kanë dhuruar dhe në një kohë të shkurtër janë mbledhur mbi 100 mijë euro.
Ish-ylli i Tottenham, Gary Lineker është solidarizuar me familjen e pilotit dhe ka dhuruar 1 mijë paund, e më pas ka bërë kërkesë që të solidarizohen sa më shumë njerëz me këtë nismë. Ndërsa shumën më të madhe sipas The Sun e ka dhuruar ylli francez, Kylian Mbappe, por duke përdorur një emër të rremë, Ellie Lottin. Mbappe ka dhuruar rreth 27 mijë euro për familjen e Ibbotson. /TIRANA TODAY
