Biznesmeni Arbër Çekaj, i dyshuar për trafikimin e sasisë së konsiderueshme prej 613 kg kokainë nga Kolumbia në Shqipëri, ka kallëzuar penalisht prokurorin e çështjes.
Burime nga grupi hetimor bëjnë me dije se Çekaj e ka dorëzuar padinë në SPAK (Prokuorinë e Posaçme). Në kallëzimin për prokurorin Ervin Kondilli, ai pretendon pasaktësi në lidhje me një dokument për të dhënat në sistemin TIMS.
Arbër Çekaj pretendon se prokurori Kondilli dhe oficerja e policisë gjyqësore, kanë falsifikuar të dhënat në TIMS (regjistri i hyrje-daljeve të shtetasve).
Kujtojmë këtu faktin se ai u prangos në Gjermani. Pas arrestimit, Çekaj kërkoi që të mos ekstradohej, me argumentin se në Shqipëri i rrezikohet jeta. Ai kërkoi azil në këtë shtet, por gjykata e Dyseldorfit vendosi pro ekstradimit të tij.
