Një ditë pas kallëzimit penal për anëtarët e Autoritetit të Dosjeve, kreu i Partisë së Lirisë, Ilir Meta, ka ndërmarrë hapin e radhës. Meta ka caktuar avokatin Genc Gjokutaj, për të ndjekur ligjërisht kallëzimin penal që ka depozituar në SPAK kundër Autoritetit të Dosjeve. Një ditë më parë, Meta u shpreh se Autoriteti i Dosjeve ka kryer të paktën 6 vepra penale, ndërsa ka nisur ndaj tij një sulm në favor të kryeministrit Edi Rama.
“Një ditë pas kallëzimit penal për anëtarët e Autoritetit të Dosjeve, ndërmorra sot hapin tjetër të radhës të caktimit të z. Genc Gjokutaj, avokat dhe ish-prokuror i njohur, për të ndjekur ligjërisht këtë çështje në funksion të një procesi të rregullt ligjor, por edhe transparent para të gjithë qytetarëve shqiptarë.
Jam i bindur në diskreditimin e plotë të këtij manipulimi dhe falsifikimi ndër më të rëndët në historinë e pluralizmit politik. Falsifikatorët do të përballen me të gjithë forcën e ligjit!”.
