Besimtarëve myslimanë që do të falin Namazin nesër, do t’iu ofrohet falas parkingu nëntokësor në Sheshin “Skënderbej”, nga ora 05:00-07:00.
Shërbimi lehtësues për besimatërt vjen në kuadër të masave që ka marrë Bashkia e Tiranës, në bashkëpunim me Komunitetin Mysliman Shqiptar, me qëllim mbarëvajtjen e këtij organizimi.
Gjatë inspektimit të Sheshit, i cili është dekoruar për festën e Fiter Bajramit, kryebashkiaku Veliaj i shoqëruar nga Myftiu i Tiranës, Ylli Gurra tha: “I kemi marrë të gjitha masat për nevojat logjistike. Parkingu nëntokësor do të jetë falas për besimtarët nga ora 5 deri në 7 të mëngjesit. Nëse parkingu i sheshit do të jetë plot, atëherë do të hapim edhe parkingun te Bulevardi i Ri, çka besoj se është mjaftueshëm për të gjithë besimtarët që vijnë nga jashtë unazës”.
Ndërsa Myftiu i Tiranës, Ylli Gurra vlerësoi Bashkinë e Tiranës për investimin dhe kontributin, ndërsa theksoi se tashmë besimtarët myslimanë do të kenë mundësi që të falen në sheshin “Skënderbej”. “Pas një dekade rikthehemi për t’u falur në një ambient publik të mirëstrukturuar, të mirëinvestuar nga Bashkia e Tiranës” tha Gurra.
