Kanceri është sëmundja e dytë me numrin më të lartë të vdekjeve dhe shpesh konsiderohet si një sëmundje e pashërueshme. Një studim nga Universiteti Johns Hopkins, ka arritur në përfundimin se 2/3 e të gjitha rasteve me kancer mund t’iu atribuohen mutacioneve gjenetike që shkaktojnë zhvillimin e masës tumorale.
Shkencëtarët me anë të studimit kërkonin të zbulonin përse disa inde në trup, si ata tek zorra e hollë dhe pankreasi, kanë norma më të larta të rrezikut të kancerit se të tjerët. Ata monitoruan ndarjen e qelizave staminale në 31 llojet e ndryshme të indeve, duke i krahasuar këto shifra me rreziqet e zhvillimit të kancerit gjatë jetës tek të njëjtat inde. Përfundimi: Sa më shumë ndarje të qelizave të ndodhin, aq më i lartë është rreziku për zhvillimin e kancerit.
Sipas Bert Vogelstein, profesor onkologjie tek Universiteti i Mjekësisë Johns Hopkins, sa më shumë ndarje të qelizave ndodhin, aq më shumë mundësi ka që të ndodhë ky mutacion.
Edhe pse hulumtuesit shkencorë kanë zbuluar se 22 lloje kanceri lidhen më shumë me mutacionet gjenetike të rastësishme, 9 të tjera – si një lloj kanceri i lëkurës, apo kanceri i mushkërisë, i zorrës, qafës dhe kokës – lidhen me faktorët mjedisorë që mund t’i kontrolloni pjesërisht, si ekspozimi shumë ndaj rrezeve UV apo duhanpirja. Këto 9 lloje kanceri influencohen gjithashtu edhe nga faktorë të trashëguar, prandaj kontrollet e herëpashershme tek mjeku mund t’ju ndihmojnë të identifikoni një tumor shumë para se ai të bëhet i rrezikshëm për jetën.
Kanceri është një përmbledhje e sëmundjeve të shkaktuara në shkallë të ndryshme, duke filluar nga gjenetika, faktorët e mjedisit dhe mutacionet e gjeneve të cituara në studimin e Johns Hopkins.
