Rrjeti më i madh social Facebook do të hapë një zyrë të re pune në Londër, gjë që do të mundësojë krijimin e 800 vendeve pune në Britaninë e Madhe në vitin 2018. Në fund të vitit tjetër, mendohet se rreth 2.300 njerëz do të punojnë për kompaninë e rrjetit social në Britani.
Zyra do të jetë qendra më e madhe inxhinierike e Facebook jashtë SHBA-së, dhe hapet gjatë vitit të saj të dhjetë në Britani të Madhe.
Nicola Mendelsohn, zëvendëspresidentja e kompanisë Facebook në Evropë, Lindjen e Mesme dhe Azi, tha se kompania ishte “më e angazhuar se kurrë në Britani të Madhe”. Ajo tha se “ekosistemi sipërmarrës dhe përsosmëria inxhinierike” e Britanisë e bëjnë atë një vend ideal për firmat e teknologjisë.
Ndërtesa shtatë katëshe në Rathbone Place, pranë Oxford Circus në qendër të Londrës, është projektuar nga Frank Gehry, arkitekti i njohur për Muzeun Guggenheim në Bilbao.
Julian David i techUK, i cili përfaqëson 950 firma teknologjike në Mbretërinë e Bashkuar, i uroi mirëseardhjen kompanisë udhëheqëse botërore të Facebook, që ka vendosur të investojë në Londër përkundër pasigurive rreth Brexit.
Kancelari Philip Hammond tha se vendimi i Facebook për t’u zgjeruar në Londër ishte një “shenjë besimi” në Britani.
“Mbretëria e Bashkuar nuk është vetëm vendi më i mirë për të filluar një biznes të ri, por është edhe vendi më i mirë për të rritur një”, shtoi ai. TIRANA TODAY
