Europa League/Dy gjysmëfinale, një trofe dhe spektakël i garantuar

Mbrëmja e sotme sjell dy përballjet e mëdha të gjysmëfinaleve të Europa League. Vëmendjen më të madhe padyshim do ta marrë supersfida që do të zhvillohet në “Emirates Stadium”, ku topçinjtë e Arsenalit do të presin Atletico Madridin e Simeones.Londinezët do të jenë më të motivuar në këtë sfidë, pasi kërkojnë që lamtumira e Arsen Wenger të shoqërohet me një trofe dhe për këtë arsye do të kërkojnë të mposhtin Atleticon dhe të sigurojnë finalen. Në krahun tjetër, madrilenët që tashmë janë praktikisht jashtë lufte për titull në Spanjë, do të tentojnë t’i shkojnë deri në fund këtij kompeticioni për të shpëtuar sezonin.Është përballja e parë mes këtyre dy skuadrave dhe premton spektakël në fushën e blertë duke pasur parasysh mentalitetin e futbollit që gëzojnë të dy kampet. Simeone u shpreh i shqetësuar dhe e vlerësoi “Emirates” si fortesën e Arsenal dhe se aty topçinjtë japin maksimumin. Në krahun tjetër, Arsene Wenger theksoi se skuadra e tij duhet të shfrytëzojë pikat e tij më të forta, siç është ajo e zotërimit të topit, ndërkohë që nuk i kurseu vlerësimet maksimale për Atletico Madrid.Sot në mbrëmje do të luhet edhe sfida tjetër gjysmëfinale mes Olympique Marseille dhe Salzburgut. Skuadra franceze nuk njeh humbje në ndeshjet e zhvilluara në “Velodrome” në këtë sezon të Europa League dhe ka një bilanc me 7 fitore e 1 barazim. Në krahun tjetër, Salzburg vjen me moralin e lartë pas eliminimit të bujshëm që i bëri Lazios në çerekfinale, teksa e mposhti 4-1 duke përmbysur humbjen 2-4 ndaj romanëve.