Taksa e Kosovës për mallrat serbe ka shkaktuar pakënaqësi të ndërkombëtarët, të cilët prej kohësh duket se ‘i kanë tërhequr veshin’ Haradinajt që ta heqë atë.
Së fundmi, është eurodeputeti gjerman dhe raportuesi për Serbinë në parlamentin Evropian, David McAllister, ai që ka kërkuar anulimin e vendimit për taksën ndaj mallrave të Serbisë dhe Bosnja dhe Hercegovinës, nga Qeveria e Kosovës.
“Vendimi i Qeverisë së Kosovës për të aplikuar taksën 100 për qind për mallrat nga Serbia dhe Bosnja e Hercegovina është një shkelje e qartë e CEFTA-s dhe e marrëveshjes së Stabilizimit dhe Asocimit. Unë i bëj thirrje Qeverisë në Prishtinë që ta anulojnë këtë vendim në mënyrë që, shpresoj, dialogu të vazhdojë”, ka thënë McAllister, raporton ‘Tanjug’.
Ai shtoi gjithashtu se tashmë BE-ja e ka bërë të qartë se nuk mund të ketë arritje të një marrëveshje ligjërisht të obligueshme ndërmjet Kosovës dhe Serbisë, pa largimin e taksës.
“Unë e kuptoj se të dyja palët kanë shqetësime, e kuptoj se nuk është e lehtë, por gjithashtu dua të theksoj se dy presidentët Aleksandar Vuçiç dhe Hashim Thaçi e kanë ngritur dialogun në nivel të ri”, ka thënë McAllister.
