Euro ka vijuar të shënojë një rënie të lehtë, por të qëndrueshme edhe gjatë kësaj jave. Rënie e euros lidhet edhe me nënçmimin e saj në bursat ndërkombëtare. Pavarësisht luhatjeve në tregjet ndërkombëtare, euro mbetet e dobët në Shqipëri.
Gjatë së premtes, një euro u këmbye me 124.48 lekë, duke arritur në nivelin më të ulët që nga fillimi i qershorit. Në 5 qershor, euro zbriti në 124.17 lekë, niveli më i ulët në 10 vjet, dhe më pas Banka e Shqipërisë ndërhyri në treg përmes tërheqjes së më shumë se 100 milionë eurove, duke e çuar euron deri në 129-130 lekë. Më pas kursi u stabilizua në rreth 126 lekë.
Që nga mesi i shtatorit, kur Banka e Shqipërisë rralloi ndërhyrjet, dhe më pas sinjalizoi tregjet se do ta linte kursin e lirë, euro filloi një zhvlerësim gradual.
