Në bazë të sistemin me rrotacion të kryesimit, Estonia merr sot presidencën e radhës të Bashkimit Evropian.
Presidenti i Këshillit Evropian, Donald Tusk, me anë të një deklarate me këtë rast, u tregua bindës se BE është në duar të sigurta gjatë gjashtë muajve të ardhshëm, pasi siç tha ai, ”Estonia është një ndër vendet simbolike që ka lënë prapa komunizmin duke u shndërruar në model për rajonin.”
Sa i përket pritshmërive tona për hapje të negociatave për anëtarësim në BE brenda këtij viti, Estonia ka treguar se do të luajë rol pozitiv në këtë drejtim.
Zv.ministri i Jashtëm, estonez, Matti Masikas gjatë një vizite para pak kohësh në Tiranë pat konfirmuar se Shqipëria e ka një mundësi për çeljen e negociatave për anëtarësim, ndryshe nga vendet e tjera kandidate. “Sa i përket zgjerimit të BE-sw, nuk do të kemi paketën e zakonshme të zgjerimit, që do të thotë nuk do të ketë progres-raporte siç ndodh normalisht në gjysmën e dytë të vitit. Kemi vendosur ta bëjmë këtë në 2018-n. Por ka një çështje dhe një shtet, që komisioni ka deklaruar se do t’i rikthehet dhe kjo është Shqipëria”, tha ai, teksa la të kuptohet se kjo mundësi varet nga vetë Shqipëria. “Janë standardet dhe një prej tyre është më thelbësorja, nisja e procesit të vettingut për anëtarët e gjyqësorit” shtoi ai.
Estonia, një vend me pozita të forta në fushën digjitale në Evropë, pas marrjes së kryesimit të Këshillit Evropian pritet të fokusohet në zhvillimin teknologjik.
Sakaq qeveria e Estonisë publikoi programin e Këshillit Evropian, të cilin do ta drejtojë nga 1 korriku deri më 31 dhjetor të vitit 2017, ku theksoi rëndësinë e lëvizjes së lirë dhe të sigurt, (jo të njerëzve”, por e të dhënave.
“Evropa duhet të përshtatet me zhvillimet teknologjike dhe duhet të përfitojë nga këto potenciale. Kjo do të ndihmojë qytetarët në jetën e tyre të përditshme dhe do të sjellë dobi të mëdha për bizneset dhe shtetet anëtare”, theksohet në program.
Estonia pritet të angazhohet edhe për zgjidhjet e problemeve tejet shqetësuese të lindura së fundi në mbarë botën, sulmet kibernetike.
