Avokati Spartak Ngjela, në një intervistë për “Euronews Albania”, e ka konsideruar si “vrasje me dashje” ngjarjen e ndodhur në Potam të Himarës, ku një 7-vjeçare u përplas për vdekje nga gomonia që drejtohej nga Arjan Tase. Sipas tij, duhet ashpërsuar Kodi Penal, pasi ka një rritje të kriminalitetit në Shqipëri.
“Është vrasje me dashje, nuk është vrasje nga pakujdesia. Duhet ashpërsuar Kodi Penal. Parandalimi është në funksion të masës së dënimit. Pse është rritur kriminaliteti në Shqipëri? Krimi paguan pushtetin gjyqësor dhe del jashtë. Është ashpërsimi i goditjes penale që krijon parandalimin. Është gjëja kryesore parandalimi”, theksoi ai.
Këtë të enjte u zhvillua një protestë për vdekjen e 7-vjeçares, ku qytetarë të shumtë protestuan para godinës së Ministrisë së Brendshme, Kryeministrisë dhe më pas Presidencës. Prokuroria e Vlorës vendosi dje të gjykojë ish-zyrtarin e policisë Arjan Tase për kryerjen e veprës penale “vrasje me dashje”, pasi aksidentoi për vdekje vajzën 7-vjeçare Jonada Avdia në plazhin e Potamit në Himarë.
Organi i akuzës së qytetit bregdetar mori vendim të ri lidhur me hetimet për vdekjen e fëmijës së mitur, pasi u caktua fillimisht se ish-shefi i Seksionit të Policimit në Komunitet të Elbasanit, e kishte kryer krimin si “vrasje nga pakujdesia”. Prokurorët e çështjes gjykuan se duke u bazuar te fakti se Tase kishte leje drejtimi motoskafi si dhe faktin që neglizhoi distancën e sigurisë nga vija e bregdetit (minimumi 150-200 m) duke u futur deri në 15 m distancë, ish-shefi i Komisariatit të Himarës të përballet me drejtësinë për akuzën “vrasje me dashje”.
Në këtë mënyrë, nëse Arjan Tase shpallet fajtor për “vrasje me dashje” ai mund të dënohet nga 10 deri në 20 vjet burg. Dënimi për këtë vepër penale është përcaktuar në nenin 76 të Kodit Penal të Republikës së Shqipërisë. “Vrasja e kryer me dashje dënohet me burgim nga dhjetë gjer në njëzet vjet”, përcakton neni në fjalë i Kodit Penal.
