Pala greke ka pezulluar punën, pasi numri prej 300 personash për të kaluar kufirin në Kapshticë për në Greqi është plotësuar.
Duke iu referuar rregullave të reja, vetëm 300 persona mund të kalojnë për sot në Kapshticë.
Policia Kufitare në Korçë ka njoftuar sot se gjatë ditës nuk do të punojë më Dogana në Kapshticë. Në një njoftim për mediat, bëhet me dije se është plotësuar kuota prej 300 qytetarësh, të cilët kanë kaluar drejt Greqisë.
“Drejtoria Vendore e Kufirit dhe Migracionit Korçë. Stacioni i Policisë Kufitare Kapshticë: Ditën e sotme, pas takimit që autoritetet shqiptare zhvilluan me palën greke, jemi informuar se nga Pika e Kalimit Kufitar Kapshticë, drejt Republikës së Greqisë do të lejohen të kalojnë vetëm 300 shtetas. Aktualisht kjo kuotë, është plotësuar dhe nga ana e palës greke është pezulluar puna.
Policia Kufitare apelon për qytetarët që duan të udhëtojnë në drejtim të Greqisë, që mos vijojnë të dynden dhe të shmangin krijimin e radhës drejt kësaj pike kalimi, pasi Dogana Greke aktualisht është e mbyllur. Ju faleminderit për mirëkuptimin!”, njofton policia.
