Paketa “Anti-KÇK”, e prezantuar ditën e sotme nga kryeministri Edi Rama, është komentuar edhe nga analisti Fatos Lubonja.
Teksa ishte i ftuar këtë pasdite në “News24”, Lubonja u shpreh se kjo paketë nuk mund të qëndrojë në një linjë me Reformën në Drejtësi. Vetëm nëse pranojmë dështimin e kësaj të fundit.
Ndër të tjera, analisti nuk i kurseu kritikat për kreun e qeverisë, për të cilin tha se ka humbur sensin e realitetit. Sipas tij, banda KÇK u krijua me qëllim për t’iu hedhur hi syve të shqiptarëve, ndërsa shtoi se në krye të kësaj bande qëndron Rama.
“KÇK është kap ç’të kapësh për gjyqtarët, e para gjë që mund të thuhet “Po Reforma në Drejtësi çfarë ishte?” O do pranojmë dështimin e Reformës në Drejtësi, ose të dyja bashkë nuk shkojnë. Është një konfuzion mendor i kryeministrit, ka humbur sensin e realitetit dhe mendon se çdo gjë që i bën mirë atij, i bën mirë dhe shqiptarëve. Ky është në pushtet, i ka të gjithë institucionet dhe ndërton institucione të tjera.
Është për të vënë duart në kokë. KÇK ishte për gjyqtarët, kjo ishte në fillim, banda kap ç’të kapësh është e gjyqtarëve. Kjo është për t’iu hedhur hi syve shqiptarëve, sepse kreu i bandës është Edi Rama. Kapet Muçi për 15 mijë euro, për apartamente, gjëra të vogla që hajt ta kapim. Kemi një kryeministër me atë të Surrelit dhe s’ka Vetting për të. Kush është banda këtu, KÇK, apo KÇKK”, deklaroi Lubonja.
