Kryeministri Edi Rama ka mbledhur sot kryebashkiakët në Pallatin e Kongresit. Mbledhja realizohet në kuadër të përgatitjes dhe mirëmenaxhimit të sezonit veror.
Sa i përket detyrimeve të prapambetura, Rama tha se qeveria do të hyjë në një fazë shtrëngimi pa tolerancë. Sipas tij, nuk mund të vazhdojë më akumulimi historik i borxheve.
Kreu i qeverisë i ka kritikuar të gjithë krerët e Bashkive, për faktin se nuk kanë aktivitet për të rigjeneruar para. Rama tha se është e pamundur që ende sot në nivel bashkiak, që nga Tirana, të mos kemi asnjë aktivitet ekonomik të pavarur që prodhon të ardhura. Duke qëndruar në të njëjtën linjë, për të, Bashkitë i kanë të gjithë mundësitë që të ndërtojnë dhe të fitojnë para për buxhetin e tyre.
“Ne do të hyjmë në një fazë shtrëngimi, pa tolerancë. Kjo është e domosdoshme, sepse nuk mundet dot që akumulimi historik i borxheve të bëhet një rrugë e hapur edhe për vitet që kemi përpara. Rritja e performancës së Bashkive është një prioritet për ne, të gjithë së bashku.
Bashkitë të mendojnë për të shtuar burimet e tyre financiare, me të ardhura që burojnë nga tregu. Është e dhëna më dramatike në këto 30 vite, që volumi i aktiviteteve që lidh Bashkitë me krijimin e të ardhurave jo buxhetore është minimal, afër zeros. Është e pamundur që ne ende sot në nivel bashkiak, që nga Tirana, të mos kemi asnjë aktivitet ekonomik të pavarur që prodhon të ardhura.
Duke filluar nga ndërtimi. Bashkitë i kanë të gjithë mundësitë që të ndërtojnë dhe të fitojnë para për buxhetin e tyre. Më thoni një kompani bashkiake që ndërton në funksion të strehimit në Shqipëri? Asnjë, nuk ka! Nuk mundet të jetë qeveria përgjigjja për çdo kërkesë dhe nevojë”, tha Rama.
