Pas polemikave me Taulant Xhakën, ka ardhur edhe reagimi i një tjetër futbollisti në lidhje me deklaratën e bërë nga trajneri Edi Reja. Ky i fundit ka deklaruar se Eros Grezda nuk ka pranuar ftesën për të qenë pjesë e kombëtares.
Përmes një postimi në Facebook, Grezda ka sqaruar se ai nuk ka marrë asnjë ftesë zyrtare nga trajneri Reja. Ai shton se nëse do i bëhej ftesa do ishte gjithmonë i gatshëm të përfaqësonte popullin shqiptar.
“Për korrektësi dhe për informimin e saktë të gjithë tifozëve, më duhet të sqaroj polemikat e krijuara rreth emrit tim. Për grumbullimin e tanishëm për dy ndeshjet e radhës, unë s’kam marrë asnjë ftesë zyrtare ose ndonjë telefonatë nga federata apo trajner i Kombëtares. Sa më përket mua personalisht, kam qenë, jam dhe do të jem gjithmonë i gatshëm të përfaqësojë popullin tim dhe të mbroj ngjyrat kuq zi”, shkruan futbollisti.
Eros Grezda u grumbullua vetëm në debutimin e Edi Reja si trajner i skuadrës kuqezi. Sulmuesi u largua pas mosmarrëveshjes me Rejën dhe që atëherë nuk është thirrur me përfaqësuesen.
