Përtej politikës, Erion Braçe është rrëfyer si rrallë ndonjëherë, duke treguar edhe për jetën e tij personale, për fëmijërinë dhe mbi të gjitha për momentet më të sikletshme.
I ftuar në episodin e tretë të “Pop Culture”, Erion Braçe ndau me moderatoren Dojna Mema një ndër momentet më të sikletshme në adoleshencë, kur është dridhur i tëri.
“Mesa duket, violina ka lënë gjurmë traumatike tek unë. Nganjëherë kthehej edhe në detyrim, sepse më largonte nga lojërat. Kur kam dalë në klasë të 8 nga shkolla ‘8 Nëntori’, mbaj mend se provimi i fundit që kam dhënë ishte pikërisht violina.
Mbaj mend si tani që më ka kapur një e dridhur, e cila nuk pushonte, aq sa dora nuk funksiononte të gjente notat, harku dridhej gjithashtu. Duke qenë se isha i mirë me mësime, drejtori i asaj kohe më la të largohesha nga provimi. Kështu që nuk dëgjoj muzikë klasike që atëherë”, u shpreh Braçe.
