Turqia do të nis drejt SHBA-së ministrin e saj të Drejtësisë i cili do të takohet me prokurorin e përgjithshëm amerikan, Jeff Sessions, në Uashington në fillim të javës së ardhshme, për të paraqitur “prova të reja” në kuadër të përpjekjeve të Ankarasë për ekstradimin e një kleriku të akuzuar si organizator i një grushti të dështuar shteti në Turqi vitin e kaluar, bëri të ditur sot media zyrtare turke.
Ministri i Drejtësisë Bekir Bozdag është parashikuar të takohet me Sessions në Uashington për t’i kërkuar paraprakisht arrestimin dhe më pas ekstradimin e Fethullah Gulenit, njoftoi agjencia shtetërore e lajmeve Anadolu Agency.
Guleni, i cili jeton në mërgim në Pensilvani që prej vitit 1999, ka hedhur poshtë çdo akuzë për përfshirje në grushtin e dështuar të shtetit të 15 korrikut të vitit të kaluar.
Gjatë vizitës në SHBA, Bozdagu pritet të theksojë qëndrimin e Turqisë, duke prezantuar në të njëjtën kohë “prova të reja“ lidhur me përfshirjen e Gulenit në organizimin e grushtit të shtetit, njoftoi agjencia turke e lajmeve.
Pak kohë pas grushtit të dështuar të shtetit, qeveria turke i dërgoi administratës amerikane dhjetëra dosje përmes të cilave pretendonte se provonin përfshirjen e Gulenit.
