Presidenti i Turqisë Rexhep Taip Erdogan ka bërë një deklaratë të fortë ditën e sotme për kryeministrin e Greqisë, Kirjakos Mitsotakis.
Gjatë festës së Lirisë dhe Paqes në Qipro që përkoi edhe me festën e Kurban Bajramit, Erdogan e quajti armik të turqve, kreun e qeverisë greke.
Nga Qipro Veriore, ai dha një mesazh për ndërkombëtarët, nuk do të ketë hapa pas në çështjen e ndarjes së ishullit.
“Të gjithë ata që janë armiq të turqve përfshirë këtu edhe Mitsotakisin, edhe ata që flasin nga Amerika me videokonferencë, le të mblidhen dhe do të flasin kundër nesh. Le të flasin. Ne po e japim mesazhin tonë. Ne kemi të drejtë. Prandaj do ta mbrojmë deri në fund të drejtën tonë. Këta flasin për të drejtat vetëm kur u intereson. Përdorin si vegël edhe Bashkimin Europian që e pranoi në union pjesën jugore. Duan që ne të heqim dorë nga shteti që qipriotët turq e krijuan me jetë, gjakë dhe dëshmorë. Askush mos të presë nga ne që të bëjmë hapa pas. Ne nuk kemi më kohë për të humbur”.
Erdogan bëri një thirrje edhe për Bashkimin Europian ku iu drejtua duke i thënë se nuk e kanë trajtuar problemin me drejtësi dhe vetëm kanë gënjyer rreth çështjes.
