Goditja e makinës së zv.drejtorit të policisë në Elbasan ka hapur një debat të gjerë në media, kanë reaguar dhe ambasadorë por për në ngjarje ka vetëm një të arrestuar i cili dyshohet se ishte shoferi i “Audit” të blinduar.
Autori i dyshuar, Enea Bektashi ka dalë sot para Gjykatës së Krimeve të Rënda për masën e sigurisë. Bekteshi ka deklaruar para trupit gjykues duke u shfajësuar se është trembur nga të shtënat dhe nuk e ka kuptuar që goditi makinën e policisë.
Enea Bektashi ka pranuar se ka qenë ai shoferi i “Audit” të blinduar, por ka rrëfyer se për pak mund të mos ishte dhe gjallë.
Bekteshi: “Kam qenë shofer i Audit A8. Nuk kisha qëllim të godisja mjetin e policisë. Nuk e kuptova që ajo që godita ishte makinë e policisë. U tremba nga të shtënat, doja vetëm të largohesha. Për pak gjë edhe mund të mos isha gjallë”, ka deklaruar Bekteshi.
Bekteshi u arrestua tre ditë më pare në qytetin e Cërrikut. Ai dyshohet se është pjesë e grupit të njohur si banda “Çela” që disa muaj më parë, më 6 gusht 2017 qëlloi me antitank biznesin e fisit” Çapja”, me të cilët kanë rivalitet në fushën e krimit. Prej ditësh forcat speciale janë përqendruar në Elbasan, në disa aksione të cilat duket se kanë marrë një dimension tjetër pas deklaratave të forta të ambasadorit Lu, i cili tha se në vend ekzistojnë 20 banda kriminale.
