Uniformat blu kanë sekuestruar në cilësinë e provës materiale rreth 7 kilogramë lëndë narkotike, cannabis sativa, si dhe kanë vënë në pranga drejtuesin e mjetit që e transportonte.
Në mjetin e shtetasit Skerdi Hasani, policia ka zbuluar në gomën rezervë drogën, e cila ishte e mbështjellë me letër natriban. Droga ishte fshehur në makinën “Toyota Rav”, që drejtohej nga 32-vjeçari. Në brendësi të gomës rezervë kishte 14 pako me lëndë narkotike cannabis sativa, me peshë rreth 7 kilogramë gjithsej.
“Shërbimet e Policisë Kufitare, kanë përzgjedhur për kontroll më të detajuar në vijë të dytë automjetin “Toyota Rav”, që drejtohej nga shtetasi Skerdi Hasani, 32-vjeç, banues ne Memaliaj, i cili udhëtonte për në Greqi.
Nga kontrolli i detajuar i kryer nga punonjësit e Policisë Kufitare, në vijën e dytë ka rezultuar se në gomën rezervë kishte të fshehura disa pako të mbështjella me letër natriban, të cilat dyshohet se janë të mbushura me lëndë narkotike cannabis sativa.
Menjëherë është njoftuar grupi hetimor, ku kanë mbërritur Specialistët për Hetimin e Narkotikëve në Drejtorinë Vendore të Policisë Gjirokastër.
Nga veprimet e kryera nga grupi hetimor, rezultoi se në brendësi të gomës rezervë kishte 14 pako me lëndë narkotike cannabis sativa, me peshë rreth 7 kilogramë gjithsej, e cila është sekuestruar në cilësinë e provës materiale, bashkë me automjetin”.
Po të njëjtat burime zyrtare shtojnë se drejtuesi i mjetit, është shoqëruar në ambjentet e Drejtorisë Vendore të Policisë Gjirokastër, ku në përfundim të veprimeve të kryera nga Specialistët për Hetimin e Narkotikëve, u bë arrestimi në flagrancë për veprën penale “Trafikimi i narkotikëve”.
