Sot në mesnatë skadon afati për dërgimin e listave të kandidatëve për deputetë nga partitë politike në Komisionin Qendor të Zgjedhjeve, (KQZ).
Teksa pritet bërja publike e të gjithë emrave të kandidatëve, burime nga Partia Demokratike bëjnë me dije se analisti dhe publicisti, Agron Gjekmarkaj do të kandidojë në qarkun e Lezhës, shkrimtarja Flutura Açka në qarkun e Elbasanit dhe zëdhënësja Ina Zhupa në Vlorë.
Ndërkohë, janë konfirmuar në listën kryesuese të PD për Tiranën 8 drejtuesit politikë të kësaj partie.
Ndër propozimet që pritet të miratohen sot në mbledhjen e kryesisë, janë dhe emrat e Flamur Hoxhës dhe Isuf Celës në qarkun e Kukësit.
Më herët gjatë ditës së sotme, kryetarja e LSI, Monika Kryemadhi prezantoi listën e kandidatëve për deputet të kësaj force politike në 12 qarqet e vendit. Vetë Kryemadhi do të kandidojë në 3 qarqe, Tiranë, Fier dhe Elbasan.
