“Shqipëria mund të bëhet me një qeverisje të vërtetë” është ky titulli i botimit më të fundit të Doktorit të Shkencave Ylli Çabiri. Një libër i ardhur prej përvojës së autorit në qeverisje, në administratën publike dhe ekspertizën e tij të detajuar në projektet ndërkombëtare. Autori u shpreh se duke lexuar librin të gjithë do të mësojnë fakte, të cilat duhet t’i zbatojnë. Pasi Shqipëria bëhet dhe nuk ka nevojë që njerëzit të ikin.
“Falenderoj çdo njeri nga i cili kam mësuar, qofshin shqiptarë apo të huaj. Të cilët nuk janë të cënuar në mendimin e tyre se Shqipëria mund të bëhet. Lexojeni, studiojeni dhe përdoreni këtë libër për Shqipërinë.”
Në ceremoninë e përurimit të librit në kryeqytet, ishin të ftuar personalitete të ndryshëm, miq, të afërm dhe bashkëpunëtor të tij ndër vite. Ndër të ftuarit special ishte bashkëshortja e kryeministrit, Linda Rama.
“Unë kam një emocion shumë të posaçëm sot, pasi me Yllin jam mësuar që të jem me të në prezantime të panumërta, në punime të përbashkëta. Kjo është hera e parë pas 20 viteve që unë jam me të dhe punimi është 100% i tij.”
Gjatë ceremonisë folën edhe disa prej miqve, si edhe njerëz të politikës të cilët u shprehen se ky libër duhet të shërbejë si një udhërrëfyes për të gjithë.
“Unë këtë libër do ta quaja, libër të politikanëve. Nga ajo administrata publike, qoftë edhe e Bashkisë, “Shqipëria mund të bëhet me një qeverisje të vërtetë” të jetë si një provim. Kush e ka lexuar futet, kush jo, nuk futet”, thotë me humor gazetari Artur Çani.
“Keni bërë një libër shumë të domosdoshëm për ne. Është i vetmi libër që rekomandon dhe jep shpresë”, shprehet ish-ministri i Shëndetësisë Sabit Brokaj.
Ndërkohë, deputetja Vasilika Hysi thotë se ky libër duhet të shërbejë edhe si pikë reflektimi për politikanët.
“Edhe unë që jam pjesë e politikës reagoja, reflektoja dhe ndjehesha keq. Ky libër vërtetë që do të shërbejë si një Bibël për ne. Për të gjithë, në atë vend pune që kemi dhe për aq mundësi sa na jepet për të bërë më të mirën.” TIRANA TODAY
