Elon Musk ka mohuar raportet se ai ka folur me Vladimir Putin, përpara se të postonte një sondazh në Twitter me sugjerimet e tij për t’i dhënë fund pushtimit rus të Ukrainës.
Ian Bremmer, kreu i konsulencës së rrezikut politik të Grupit Eurasia, pretendoi se Musk i kishte thënë personalisht atij për bisedën me Putin. Por Musk tani e ka hedhur poshtë këtë.
“Kam folur me Putinin vetëm një herë, dhe kjo ishte rreth 18 muaj më parë. Tema ishte hapësira”, shkroi Musk në Twitter.
Javën e kaluar, CEO i Tesla-s u kërkoi 107.7 milionë ndjekësve të tij të votonin për mënyrat për të zgjidhur luftën në Ukrainë.
Sugjerimet përfshinin një propozim për të mbajtur votime në pjesë të Ukrainës të pushtuara nga Rusia, që Kremlini thotë se i ka aneksuar. Komentet e tij u mirëpritën nga Moska.
Multimiliarderi tha: “Rusia largohet nëse ky është vullneti i popullit”. Presidenti Putin ka shpallur tashmë katër rajone të Ukrainës si pjesë të Rusisë, pas të ashtuquajturave referendume të denoncuara si mashtruese nga Kievi dhe aleatët e tij perëndimorë. Rusia nuk kontrollon plotësisht asnjë nga katër rajonet.
Musk sugjeroi gjithashtu se bota duhet “formalisht” të njohë Krimenë – e aneksuar ilegalisht nga Moska në 2014 – si pjesë e Rusisë. Në një gazetë, Bremmer shkroi se Musk i tha atij se presidenti rus ishte “i përgatitur për të negociuar”, por vetëm nëse Krimea do të mbetej nën kontrollin rus, nëse Ukraina do të pranonte një formë neutraliteti të përhershëm dhe nëse Kievi do të njihte aneksimin e Rusisë të Luhanskut, Donetsk , Kherson dhe Zaporizhzhia. Sondazhi fillestar i Musk shkaktoi polemika të gjera.
Ministri i Jashtëm ukrainas Dmytro Kuleba tha se njerëzit që i propozojnë Ukrainës të heqë dorë nga populli dhe toka e saj “duhet të ndalojnë së përdoruri fjalën “paqe” si një eufemizëm për “të lënë rusët të vrasin dhe përdhunojnë mijëra ukrainas të tjerë të pafajshëm dhe të rrëmbejnë më shumë tokë”.
Mjeshtri rus i shahut Garry Kasparov e quajti postimin e Musk në Twitter “idiotësi morale, përsëritje e propagandës së Kremlinit, një tradhti ndaj guximit dhe sakrificës ukrainase”.
Zëdhënësi i Kremlinit, Dmitry Peskov, mirëpriti sugjerimet e Musk, duke thënë: “Është shumë pozitive që dikush si Elon Musk po kërkon një rrugëdalje paqësore nga kjo situatë”.
Burimi i lajmit: BBC. Përshtatur nga Tirana Today
