Këngëtarja e njohur shqiptare Eli Fara bëri mjaft zhurmë në media dhe në rrjetet sociale jo për një projekt muzikor, por për shkak të një posti që pretendohet se ka mbajtur në administratë. Sikundër u aludua dy ditë më parë e që lajmi bëri jehonë, lidhej me faktin se nga Thesari i Shtetit, Eli Fara, nga muaji janar 2006 deri në muajin gusht 2009, është paguar në Ministrinë e Mbrojtjes “Drejtore Inovacinosh”. Më pas kur ministri Fatmir Mejdiu, kaloi në postin e radhës, zgjodhi që të kishte të njëjtin staf. Pasi u zgjodh si Ministër Mjedisi, e kishte emëruar këngëtaren si “Drejtore të Përgjithshme për Ngrohjen Globale”. Përveç rrogës, Fara ka lëvizur disa herë jashtë vendit me pretendimin për “udhëtime pune”. Sipas sistemit “TIMS” të viteve 2006-2013, rezulton se ministri Fatmir Mediu dhe vartësja Eli Fara, në 23 raste kanë udhëtuar bashkë në Amerikë dhe në 42 herë të tjera në vendet e Bashkimit Europian.
Por si qëndron e vërteta? Pse në këtë periudhë doli ky lajm, dhe çfarë fshihet pas kësaj? Personi që ka hedhur poshtë këtë lajm që është bërë viral, është ish-sekretarja e Përgjithshme në Ministrinë e Mjedisit, Mimoza Vokshi. Në një prononcim për ‘Dosja.al’, Vokshi shprehet se nga muaji dhjetor i vitit 2011 deri në muajin shtator të vitit 2013, periudhë gjatë të cilës ajo ka qenë e punësuar në këtë ministri, nuk ka dijeni të jetë paguar asnjë qindarkë për Eli Farën. Sipas ish-zyrtares, këngëtarja nuk ka mbajtur asnjë post në këtë ministri, siç dhe u raportua më herët nga mediat e tjera.
“Unë kam qenë Sekretare e Përgjithshem e Ministrisë së Mjedisit nga muaji dhjetor i vitit 2011 deri në shtator të vitit 2013. Referuar lajmit në fjalë, gjatë periudhës kur unë punoja në Ministrinë e Mjedisit, nuk ka qenë e punësuar ky person dhe nuk di të jetë paguar asnjë qindarkë për personin ne fjalë. Pra nuk ka punuar në ministri, dhe nuk është paguar asnjë qindarkë për zj.Fara”, është shprehur Mimoza Vokshi.
Edhe Adriatik Mema, ish-Sekretar i Përgjithshëm në Ministrinë e Mbrojtjes (aktualisht kryetar i Bashkisë Skrapar), ka qëndruar në të njëjtën linjë. Mema mohon faktin që këngëtarja Eli Fara të ketë qenë e punësuar në Ministrinë e Mbrojtjes, dhe të ketë marrë para nga ky institucion, gjatë kohës që ai ka mbajtur postin e Sekretarit të Përgjithshëm.
“Përshëndetje. Në cilësinë e ish-Sekretarit të Përgjithshëm në Ministrinë e Mbrojtjes, për sa ju me pyesni, ju deklaroj se: në strukturën e Ministrisë së Mbrojtjes nuk ka ekzistuar Drejtori Inovacioni. Po ashtu, personi për të cilin ju më pyesni, nuk ka punuar asnjë ditë në Ministrinë e Mbrojtjes dhe për pasojë nuk ka përfituar asnjë qindarkë nga kjo ministri. Faleminderit”, deklaron Mema.
Ky reagim vjen në një kohë kur në media është shkruar se Eli Fara ka marrë 8 vite pagë si “drejtoreshë” në 2 ministri, duke përfituar 65 udhëtime pune me asokohe ministrin Fatmir Mediun.
