16 predha luftarake janë gjetur në Elbasan, e ndërsa dyshohet se janë të Luftës së Dytë Botërore. Predhat janë zbuluar rastësisht nga kompania që po punon për rikonstruksionin e një segmenti rrugor, pranë Gjykatës së re të qytetit të Elbasanit.
Fadromisti i kompanisë që po zbaton projektin, gjatë gërmimeve ka konstatuar ekzistencën e predhave luftarake, në thellësi të bazamentit të rrugës në lagjen “Kongresi i Elbasanit”. Gjatësia e predhave luftarake, sipas dëshmitarëve, shkon rreth 50 cm, dhe aktualisht 9 prej tyre janë të ekspozuara në diell. Temperaturat e larta janë rrezik potencial për shpërthimin e tyre, dhe shkaktimin e një tragjedie të mundshme.
Autoritetet kompetente kanë neglizhuar evadimin e tyre prej të paktën 48 orësh, dhe deri tani kanë larguar vetëm 6-7 predha. Banorët nuk ngurojnë të shprehin frikën, pasi një pakujdesi mund të shkaktojë shpërthimin e tyre.
