Sfidat mes Barcelonës dhe Realit shpesh përkthehen si sfida mes Ronaldos dhe Mesit. Megjithatë në këto sfida protagonist vazhdon të jetë Crisitiano Ronaldo. Në sfidën e së dielës 32-vjeçari, përveçse vendosi një hipotekë të fuqishme mbi trofeun e Superkupës, vendosi të hakmerrej edhe ndaj Leo Mesit.
Argjentinasi Leo Messi, pak muaj më parë teksa vendoste në minutat e fundit fatin e “El Clasicos” së kampionatit në “Santiago Bernabeu”, vendosi që golin e fitores ta festonte duke i treguar publikut vendas pjesën e pasme të fanellës së tij. Ronaldo e ka deklaruar shpesh që jeton me sfida dhe kjo përballje e Messit ndaj popullit të tij ka mbetur një “kafshatë e pa kapërdirë”. Në ndeshjen e së dielës, teksa shënonte golin e avantazhit për Realin, portugezi vendosi të festonte duke lëshuar fanellën në ajër dhe duke treguar muskujt.
Shokët vërshojnë ta përqafojnë dhe i fundit që ndalet pranë tij është Marselo, që pasi i thotë diçka, i rikthen fanellën, të cilën Ronaldo e ngre për t’ia treguar të gjithë “Kamp Nou”-t, një gjest i ngjashëm me atë që Mesi bënte disa muaj më parë.
Ronaldo u ndëshkua me karton të verdhë që disa minuta më vonë do t’i kushtonte daljen nga fusha pasi një pengim të tijin në zonë arbitri i ndeshjes e interpretoi si simulim. Karton i kuq ndal vetëm Ronaldon, por jo Realin që me anë të perlës së Asensios gjen golin e tretë. Tani topi është në fushën e Mesit që së bashku me të tijtë do të mundohet të gjejë një tjetër mënyrë festimi, për hapin e ardhshëm të kësaj sfide mes dy kampionësh absolutë.
