Një 19-vjeçar doli për të kaluar mbrëmjen me miqtë në një nga lokalet e Shkodrës, por shëtitja përfundoi në tragjedi. Erjon Xhenje mbeti i vrarë një natë më parë në atentatin në Shkodër. I riu u qëllua me armë zjarri teksa ishte duke pirë kafe në një lokal pranë kryqëzimit të Kirasit, në zonën e njohur si “Rruga e Gjerë”. Autorët, të cilët lëviznin me motoçikletë, qëlluan me breshëri plumbash duke e lënë të vdekur në vend.
Asnjë gjurmë nga autorët
Autorët kanë arritur të largohen nga vendi i ngjarjes përmes rrugicave dytësore. Uniformat blu gjetën motorin e vrasësve së bashku me armën e krimit në lagjen “Guerrile”, 500 m larg vendit u ku ekzekutua Erjon Xhenje.
I riu i afërm i dy vëllezërve Xhenja, të shpallur në kërkim për atentat në 2021
Viktima rezulton person i afërm i vëllezërve Sehar Xhenja, 24 vjeç dhe Shkëlzen Xhenja, 25 vjeç. Këta të fundit së bashku me Eljon (Esmeraldo) Hato, 31 vjeç qëlluan me 2 pistoleta drejt Taulant Pepajt, 30 vjeç në 20 shkurt 2021. Ngjarja ndodhi në lagjen “Skënderbeg” të Shkodrës, pranë një pike karburanti. Pepaj ndodhej në makinën e tij “Volkswagen” me një person tjetër. Autorët u larguan pas ngjarjes dhe ndodhen në arrati. Ata akuzohen për veprat penale “Vrasje ndaj dy ose më shumë personave” e kryer në bashkëpunim, mbetur në tentative dhe “Armëmbajtja pa leje”.
Pepaj, banues në Shkodër u arrestua në 2017 për veprën penale “Plagosje e rëndë me dashje” pasi më 25.06.2017 në lagjen ”Baçallëk ”, gjatë një konflikti të çastit ka plagosur me armë zjarri shtetasin R. Th., 22 vjeç, banues në Shkodër. Eljon (Esmeraldo) Hato është një person i njohur për policinë, i përfshirë në disa ngjarje kriminale. Më e fundit ajo në zonën e ish-Bllokut në kryeqytet, ku mbeti i vrarë Fabian Gaxha. Në 4 maj 2015, ai u arrestua pasi akuzohej për një vrasje dhe plagosjen e një tjetër personi në vitin 2014. Nuk dihet ende nëse kjo ngjarje e vitit të kaluar ka lidhje me ekzekutimin e 19-vjeçarit Erjon Xhenje mbrëmjen e kaluar në Shkodër. Shkak i këtij sherri mendohet se kanë qenë konfliktet e kaluara mes Shkëlzen Xhenjes, Eljon Hatos dhe Taulant Pepajt. Ata kanë qëndruar në një qeli burgu dhe për dy vite janë konfliktuar mes tyre për kontrollin e qelisë.
