Ushtria amerikane në Afganistan njoftoi të dielën se të paktën dy ushtarë të saj janë vrarë dhe gjashtë të tjerë u plagosën kur një ushtar i forcave aleate afgane, qëlloi me armë ndaj tyre.
Një zëdhënës i forcave amerikane tha se ngjarja ndodhi në distriktin Sherzad të provincës lindore të vendit, Nangarhar.
Zyrtarët e ushtrisë amerikane thanë se po mbledhin informacione rreth shkakut apo motivit të sulmit për të cilin nuk dihet ende asgjë.
Ministria afgane e Mbrojtjes njoftoi se gjatë incidentit u vra edhe një ushtar afgan.
Gjatë incidentit u vra gjithashtu edhe autori i sulmit.
Autoritetet kanë nisur hetimet mbi ngjarjen.
Provinca e Nangarharit kufizohet me Pakistanin dhe disa nga distriktet e saj shërbejnë si “kështjella” për kryengritësit talebanë apo baza për militantët e lidhur me grupin terrorist terrorist të Shtetit Islamik.
Në Afganistan operojnë rreth 13 mijë trupa amerikane. Disa prej tyre kanë si detyrë të kryejnë operacione kundër terrorizmit, ndërsa pjesa tjetër shërbejnë në kuadër të misionit të udhëhequr nga NATO duke ndihmuar në trajnimin dhe këshillimin e forcat afgane të sigurisë që luftojnë ndaj Talibanëve. /Voa
