Gjykata e Apelit ka lënë në fuqi masën e” arrest me burg” për Islam Myrkaj, i cili vrau me armë zjarri Haxhi Baçinozin, në zonën e Liqenit Artificial në Tiranë.
Autori i dyshuar i ngjarjes, Islam Myrkaj, 61-vjeç nga Fieri, është vetëdorëzuar më 20 mars në policinë e Tiranës, i shoqëruar nga avokati i tij.
Duke iu referuar dëshmisë së dhënë në polici, Myrkaj ka shprehur pendesë, dhe se e ka kryer krimin në gjaknxehtësi e sipër. Po kështu ai ka thënë se me viktimën janë takuar tek Liqeni dhe se e ka vrarë, pasi e kishte sharë e më tej e kishte goditur.
“Jam penduar, e vrava në gjaknxehtësi e sipër. Tek Liqeni e takova rastësisht. Më shau dhe më goditi. Konflikti ynë është i hershëm për 45 mijë euro. Haxhiu më përndiqte edhe vajzat për këtë borxh. Familja ime kërcënohej prej tij vazhdimisht”, mësohet të ketë thënë ai në polici.
