Telefoni i viktimës duket se ka zbuluar krimin që ndodhi në shtëpinë e Marsida Qatjas. Kqyrja e celularit të viktimës, ka nxjerrë në pah detaje të tjera tronditëse.
Burime nga grupi hetimor thanë se në telefonin e Haxhollit janë zbuluar mesazhe që ai ka shkëmbyer vazhdimisht me Toçin. Aty flitej për shuma të ndryshme parash. Po sipas hetuesve, këto para kanë të bëjnë me shitje kokaine, nisur edhe nga fakti se viktima ishte përdorues. Në këtë formë hidhet poshtë motivi i komentuar më herët, ai i xhelozisë.
Burimet shtojnë se aty janë gjetur edhe komunikime në formë kërcënimesh që Haxholli kishte shkëmbyer edhe me persona të tjerë në Kavajë, të cilëve u kërkonte para. Po kështu, edhe në telefonin e të dyshuarit, Bledar Toçi, janë gjetur sms të shkëmbyera me viktimën.
Ndryshe nga sa u duk në fillim se vrasja erdhi si një konflikt pasioni me në qendër Marsida Qatjan, Prokuroria ka zbuluar se viktima dhe autori kanë pasur konflikte të mëparshme, që nuk lidheshin me 30-vjeçaren.
Ndaj 30-vjeçares, Gjykata ka dhënë masën “detyrim paraqitje”, si edhe sekuestrimin e pasaportës, në mënyrë që të mos dalë jashtë vendit.
