Blutë e Tiranës tashmë kanë vënë në pranga një 47-vjeçar, lidhur me ekzekutimin mafioz të ish-policit Arben Bilali. Arben Tirana (Xhetani), dyshohet se u ka siguruar atentatorëve targat e vjedhura për makinën që u përdor për krimin.
Ish-policit Arben Bilali i kanë vrarë dy vëllezërit, Bujar dhe Leonard Bilali. Bujar Bilali mbeti i vrarë, dyshohet gabimisht, në vitin 1998, ndërsa Leonardi, vëllai i vogël i tij, ish-mundës i Dinamos, u ekzekutua më 10 gusht të vitit 2010, në të njëjtin vend ku u vra 50-vjeçari. Edhe vetë Arben Bilali i pati shpëtuar një atentati dy muaj para se të vritej vëllai i tij, Leonardi.
Identifikimi
Burime nga grupi hetimor janë shprehur se identifikimi i tij është bërë pas analizimit të provave që u fiksuan në automjeti tip “Mercedez Benz CLS”, me ngjyrë blu të errët, që u gjet në afërsi të Mjull Bathores, pak orë pas ngjarjes.
Pas verifikimeve rezultoi se bëhej fjalë për të njëjtën makinë, me targa AA 757 RV, të vjedhura dy vite më parë nga një “Fiat Punto” në Vlorë, që ishte përdorur në krim. Autorët që kryen ekzekutimin e Arben Bilalit, mesditën e 30 janarit të këtij viti, ende nuk janë identifikuar nga policia.
I arrestuari vodhi atasheun e SHBA në vitin 2013, në Lushnje
47- vjeçari që u arrestua dje nga Policia e Tiranës, si i përfshirë në vrasjen e ish-policit Arben Bilali, ka qenë i dënuar e i proceduar disa herë për vjedhje, kryesisht automjetesh. Ngjarjet për të cilat ai është hetuar më parë, kanë ndodhur në Tiranë, Durrës, Lushnje, Vlorë, por edhe në qytete të tjera. Por ngjarja që bëri më shumë bujë, për të cilën Tirana u shpall fillimisht në kërkim e më pas u arrestua, ka qenë ajo e vitit 2013, kur u vodh atasheu ushtarak i SHBA-ve në Lushnje.
Për këtë ngjarje, ai u arrestua nga shërbimet e Komisariatit nr.1 të Tiranës, 3 muaj pasi kishte ndodhur vjedhja në Lushnje. Burimet zyrtare të Drejtorisë së Policisë së Fierit bënë të ditur në atë kohë se ka qenë ora 17:30 e pasdites, kur atasheu ushtarak që shërben në ambasadën shqiptare në SHBA, i cili po udhëtonte me një furgon nga Tirana drejt Vlorës dhe pasagjerët e tjerë që ndodheshin në të njëjtin automjet, janë ndalur për një kafe disa minutëshe në një bar në autostradën Lushnje-Fier.
Atasheu ka pasur me vete edhe një çantë, në të cilën kishte një kompjuter portativ, ku kishte të dhëna të shërbimit që kryente dhe sende të tjera që i përkisnin punës. Sipas dyshimeve të policisë, duke qenë se nga paraqitja e jashtme, ai ndryshonte nga pasagjerët e tjerë të furgonit, është pikasur nga tre të autorët e dyshuar, mes tyre edhe Arben Tirana, që ishin ulur më parë në të njëjtin bar e po konsumonin nga një pije.
Ata kanë vërejtur se para se të zbriste, atasheu ishte kujdesur ta vendoste çantën e tij në një prej sediljeve të furgonit, dhe kanë vendosur ta vjedhin atë, me shpresën se mos aty gjendeshin sende me vlerë. Gjithashtu, hajdutët janë siguruar se shoferi i furgonit nuk i ka mbyllur dyert e mjetit.
Sapo atasheu ka porositur kafenë, tre autorët janë ngritur dhe dy prej tyre kanë shkuar tek automjeti personal, të cilin e kishin parkuar para lokalit. Kur ata kanë ndezur makinën, tjetri ka nxituar të shkojë tek furgoni e të marrë çantën e atasheut, dhe janë larguar që të tre me shpejtësi me një autoveturë tip “Peugeot”.
