Sa i takon vrasjes së dyfishtë në Shkodër, që tronditi mbarë opinionin publik, burime nga grupi hetimor bëjnë me dije se pista kryesore e hetimeve lidhet me dyshimet se Boran Bërçana ka qenë pjesë e një grupi kriminal të rrezikshëm në Shkodër.
Ai dyshohet se ka bashkëpunuar me këta persona edhe në kohën që ishte polic, madje disa herë ka marrë vërejtje kur ishte në radhët e uniformave blu. Gjithashtu grupi i ekspertëve ka filluar të analizojë dosjet e ish-policit, për të zbuluar nëse ka pasur konflikt me njeri. Nga dosjet që ka pasur në përgjegjësi Boran Bërçana në kohën që ishte polic, do të shikohen personat që ka arrestuar, për të zbuluar nëse ndonjëri prej tyre kishte arsye për tu hakmarrë, raporton “Shqiptarja”.
Dy persona kanë qenë bashkëpunëtorë në ekzekutimin e çiftit. Vrasësit kanë qenë në makinën “Benz”, që u gjet e djegur dhe po prisnin mbërritjen e çiftit. Sapo automjeti ka mbërritur, njëri prej atentatorëve ka dalë nga makina dhe ka qëlluar me breshëri në drejtim të Boran Bërçanas dhe Silva Ndocit. Boran Bërçana ka marrë 1 plumb në fytyrë dhe 4 në trup, ndërsa Silva Ndoci 1 plumb në kokë dhe 5 në fytyrë.
