Një ngjarje e rëndë tronditi Vlorën mesditën e 10 majit, ku u ekzekutua në një atentat mafioz 40-vjeçari Bledar Birçaj.
Drejt automjetit tip ”BMW X5” me të cilin ai lëvizte në zonën e njohur si “Bishti i Kalldrëmit” u qëllua me breshëri kallashnikovi nga dy persona që i kishin zënë pritë.
Fatmirësisht, nga breshëria e plumbave arritën të shpëtonin pasagjerët që ndodheshin në makinë me të. Në vendin e parë ishte i ulur agjenti i antidrogës Granit Deromema, ndërsa në sediljen pas ishte kushëriri i viktimës, 20 vjeçari Edison Zenelaj.
Përpara grupit hetimor, Zeneli ka thënë se në momentin që ka ndodhur krimi po luante në rrjetet sociale dhe se nuk ka parë asgjë. Ai është shprehur i tronditur për ngjarjen dhe nuk ka qenë në gjendje të jepte shumë përgjigje.
Kush është viktima Bledar Birçaj?
Bledar Birçaj është një emër jo i panjohur për policinë e Vlorës, pasi në 21 dhjetor 2010, ai së bashku me vëllanë e tij, Elton Birçaj, kanë dhunuar barbarisht ish-juristin e hipotekës së Vlorës me inicialet F.H.
Për këtë ngjarje, dy vëllezërit janë proceduar në gjëndje të lirë. Shkak i kësaj ngjarje është bërë, problemet që ata kanë pasur me dokumentacionin në një pronë që ndodhet në qytetin e Vlorës.
Birçaj është arrestuar dhe në 27 janar 2011 nga policia dhe prokuroria e Vlorës pasi dyshohej për kryerjen e veprës penale të “Vrasjes me paramendim” e kryer në bashkëpunim mbetur në tentativë; “prodhimit dhe mbajtjes pa leje të armëve luftarake dhe municioneve”; si dhe “Shkatërrim prone”, për tu liruar më pas në prill të 2011-ës.
Mësohet se Birçaj kishte vetëm një muaj që ishte kthyer nga Spanja, dhe një nga pistat ku po hetohet janë konfliktet që mund të ketë pasur në vendin iberik.
