Policia e Kosovës ka shpallur në kërkim dy persona, pasi dyshohet se janë autorë të vrasjes së politikanit serb Oliver Ivanoviçit.
Me autorizim të Prokurorisë Speciale, policia ka publikuar po ashtu dy fotografitë e dy të akuzuarve, kurse identitetet e tyre nuk janë bërë me dije. Sipas Policisë, postimi i këtyre fotografive bëhet me qëllim që të identifikohen më lehtë nga ana e qytetarëve. Të cilët mund të ndihmojnë në gjetjen e tyre.
“Drejtoria për Hetimin e Krimeve të Rënda në bashkëpunim me Prokurorinë Speciale të Republikës së Kosovës (PSRK) është duke hetuar rastin e vrasjes z. Oliver Ivanoviç. Me autorizim të Prokurorisë Speciale, Policia e Kosovës publikon fotografitë e dy personave të dyshuar për rastin ‘vrasje’ të datës 16/01/2018 në Mitrovicën Veriut.
Policia e Kosovës kërkon nga qytetarët e Republikës së Kosovës që kushdo që ka informacion për personat e dyshuar në fotot e bashkangjitura, të lajmërojë Policinë e Kosovës përmes numrit konfidencial të telefonit 080019999, adresën elektronike [email protected] ose të paraqiten në stacionin më të afërt policor”, theksoi policia përmes komunikatës.
Personat në fjalë thuhet se janë parë në rrugën “Lola Ribar” në Mitrovicën Veriore. Oliver Ivanoviç u vra më 16 janar të vitit 2018.
