Autorët e vrasjes së dyfishtë të ndodhur në Laç, kanë deklaruar para hetuesve se gjithçka ka ndodhur në gjaknxehtësi e sipër. “Nuk deshëm t’i vrasim kushërinjtë Jushi. Gjithçka ka ndodhur në gjaknxehtësi e sipër”, kanë thënë vëllezërit Markel dhe Manuel Bushi, dhe kushëriri i tyre Vinçens Bushi. Ata kanë shfaqur shenja pendese, ndërsa vranë kushërinjtë Erion dhe Kelvin Jushi.
Nga hetimet dhe dëshmitë e mbledhura, rezulton se autorët dhe viktimat, janë përplasur fillimisht në ambientet e një lokali në qendër të Laçit, dhe më pas në sherr e sipër janë përdorur armët.
Sipas të dhënave, ata ishin të njohur me njëri-tjetrin, dhe mësohet se debati në lokal ka nisur për një foto në rrjetet sociale. (Pakënaqësi për fotot e postuara, “pse e ke hedhur këtë foto”, mësohen të jenë shprehur të rinjtë)
Ende nuk dihet personi që ka qëlluar me armë, por po analizohen gëzhojat e gjetura në vendin e ngjarjes. Ngjarja e rëndë u shënua mbrëmjen e së dielës, rreth orës 20:15, në lagjen nr. 1 në qytetin e Laçit.
Për dorëzimin e autorëve ka negociuar shefi i komisariatit të Kurbinit me dajën dhe dy vëllezërit të dyshuar si autorë të ngjarjes.
