Pasditen e djeshme u ekzekutua me 7 plumba 57-vjeçari Ismet Çekorja në lagjen “Guerile” të qytetit të Shkodrës. I ndjeri u qëllua pranë shtëpisë së tij. Nga ana e policisë janë sekuestruar kamerat e sigurisë, për të bërë të mundur identifikimin e ekzekutorëve të Ismet Çekorjes. Viktima u thirr nga një person, i cili i tregoi se e kërkonte dikush. Pasi ka dalë nga banesa, ndaj tij është qëlluar me breshëri plumbash. Vrasja e tij ndodhi pas 5 ditësh kur ai akuzoi publikisht strukturat shtetërore dhe grupet kriminale se po i shqetësojnë familjen, kur u shpall në kërkim djali i tij Bajram Çekorja, 24 vjeç së bashku me Tonato Fushajn, 20 vjeç për atentatin e dështuar në 25 gusht në Shkodër ndaj Alban Bruçit.
Hetimet
Disa persona të cilët kanë qenë prezent në momentin e vrasjes së 57-vjeçarit në Shkodër, janë shoqëruar në Komisariatin e Policisë së Shtetit. Mes tyre edhe Alban Bruçin dhe babain e tij.
Kamerat e sigurisë, të cilat janë sekuestruar nga policia në bizneset e zonës kanë mundur që të fiksojnë autorin. Ai ishte me motor dhe me skafandër, duke e fshehur identitetin e tij.
Deri në këto momente nuk ka asnjë autor të dyshuar të këtij krimi, dhe pista kryesore që po hetohet është konflikti i djalit të tij që është akuzuar si autor i atentatit Alban Bruçi.
Çfarë thoshte Ismet Çekorja
Kërkimin për arrestimin e të birit nga policia për atentatin ndaj Alban Bruçit, Ismet Çekorja e quajti sulm të organizuar nga banditë të veshur me pushtet dhe hajdut biçikletash. Ai bëri thirrje që të bëhet drejtësi me familjen e tij, dhe të gjitha ngjarjet për të cilat akuzohet i biri 24-vjeçar. “Këto sulme ndaj familjes tonë i bëjnë disa banditë, hajdutë biçikletash dhe banditë të veshur me pushtet.
Se cila është arsyeja, ne nuk e dimë. Ajo që kërkojmë është drejtësia. Djali im është i pafajshëm dhe nuk ka marrë pjesë në asnjë prej ngjarjeve kriminale për të cilat është i dyshuar. Janë të gjithë inskenime, dhe tani ai duhet të qëndrojë rrugësh dhe nuk mundet as të punojë, as asgjë. Kërkojmë drejtësi dhe të zbardhen ngjarjet”, tha për mediat Ismet Çekorja.
