Vrasja e Eglantina Bucit, e ndodhur në vitin 2012 nga babai dhe vëllai i saj është zbardhur nga shoku i dikurshëm i Shkëlzen Bucit.
Ai u arrestua në vitin 2017 për një vepër tjetër penale, ku tha se kishte dijeni për vrasjen e ndodhur në vitin 2012.
I penduari ka treguar se ka qenë ai vetë që ka transportuar Shkëlzen Bucin dhe motrën e tij me makinë. Sipas gazetares, Klodiana Lala, shoku e ka mësuar rrugës se Buci debatonte me të motrën për shkak të një lidhjeje të saj me një djalë.
Rezulton se identifikimi i vajzës është bërë përmes krahasimit të ADN-së me nënën. Faik Buci ishte i ndarë nga e shoqja dhe për të mos rënë në gjurmët e hetimit, krahasimi është bërë me ADN-në e nënës.
Edhe pse ndaj tij është firmosur arresti me burg, babai i viktimës mohon përfshirjen në ngjarje. Por shoku i Shkëlzenit tregon se edhe më herët ka pasur një tentativë të vrasjes së vajzës nga ana e babait, por ai dështoi dhe më pas në lojë hyri i vëllai.
Shkëlzen Buci ndodhet aktualisht në burg, i dënuar me 13 vite për tentativën e vrasjes ndaj aktorit Mishel Prela.
Në vitin 2012, ishte nëna e viktimës, Lirije Buci që depozitoi kallëzim penal për zhdukjen pa gjurmë të vajzës. Ajo i tha policisë se prej disa muajsh vajza ishte larguar nga banesa dhe nuk kishte asnjë kontakt me të.
Në atë kohë, Faik Buci dhe Shkëlzen Buci, hodhën dyshime të forta se vajza mund të ishte trafikuar si prostitutë në Itali.
Shkëlzen Buci qëlloi me armë zjarri të motrën duke e lënë të vdekur në vend. I ndihmuar nga babai i tij, Faik Buci, ata e çuan trupin në Malin me Gropa, duke e lënë aty të braktisur pasi e kishin mbuluar me gurë.
