Kastriot Reçi u ekzekutua me snajper rreth orës 11 të së martës, teksa po hynte në lokalin e tij në qendër të qytetit të Rrëshenit. Dyshimet janë se vrasja është kryer për hakmarrje, në vijim të një sage krimesh që kanë goditur ndër vite qytetin e Rrëshenit. Nga tërësia e veprimeve hetimore dhe analizimi i të gjithë të dhënave për ekzekutimin e biznesmenit Kastriot Reçi, dyshohet se qitësi ishte profesionist.
Dyshimet janë se ai ishte vrasës me pagesë. Ekzekutori ka qëlluar nga rreth 200 metra largësi nga brenda një apartamenti. Bëhet fjalë për një profesionit. Jo vetëm që nuk ka dëmtuar persona të tjerë, por i shkaktoi vdekjen Reçit me vetëm një goditje.
Hetimet
Aktualisht puna është përqendruar tek pamjet e kamerave të sigurisë, dhe ekzaminimi i një parukeje të gjetur që dyshohet se u përdor nga autori. Duke iu referuar pamjeve të kamerave të sigurisë që kanë filmuar ngjarjen, 47 vjeçari u qëllua pasi puthi një fëmijë.
Autori i maskuar
Nga pallati ku kreu vrasjen, autori dyshohet se u largua i maskuar si grua, ndërsa maska u gjet në afërsi të tregut. Kjo provë dhe pamjet e kamerave të sigurisë që kanë filmuar autorin, po analizohen më imtësi. Por sipas burimeve, identifikimi mbi bazë të pamjes është i vështirë.
Verifikohet telefoni i viktimës
Po verifikohet edhe telefoni i viktimës për të parë bisedat telefonike apo dhe mesazhet e kohëve të fundit me ndonjë person të dyshimtë.
Viktima e Rrëshenit i kishte lëvizjet e kufizuara/ Çfarë fshihet pas krimit
