Ministrja e Drejtësisë Etilda Gjonaj tha sot se ekstradimi i Nazer Setit u bë në zbatim të vendimeve të gjykatave shqiptare. Me anë të një postimi në rrjetin social “Facebook”, Gjonaj deklaron se ka zbatuar të gjitha konventat ndërkombëtare për ekstradimet dhe ka zbatuar të gjitha vendimet e gjykatave shqiptare.
Deklarata e ministres u bë dy ditë pas keresës së kryeprokurores Arta Marku për të hetuar ekstradimin e Seitit (lajmin e plotë lexoje këtu).
Setiti, i cilësuar si financieri i grupit kriminal të drogës ‘Habilajve’ u ekstradua një javë më parë në Itali me kërkesë të drejtësisë italiane. Por në media u fol se kjo levizje ishte e jashtë ligjshme. (lajmin e plotë lexoje këtu).
Seiti u arrestua në fshatin Babicë, gjatë një operacioni teksa u sekuestruan rreth 4 ton lëndë narkotike Cannabis Sativa.
Nisur nga përgjimet ambientale, por edhe telefonike rezulton se Nezar Seiti lëvizte shpesh nga Shqipëria drejt Italisë dhe anasjelltas dhe kishte detyra të siguronte ambiente dhe pjesën logjistike të grupit.
Nezar Seitit i është ofruar statusi i bashkëpunëtorit, por ai e ka refuzuar një “marrëveshje” të tillë, ndërsa ka pranuar para prokurorëve të Krimeve të Rënda se ka lidhje krushqie me Habilajt, pasi gruaja e tij i ka kushërinj.
Postimi i plotë i ministres Etilda Gjonaj
Nezar Seitaj u ekstradua në Itali, në zbatim të vendimeve të gjykatave shqiptare dhe kërkesës për ekstradim nga Ministria e Drejtësisë italiane, konform ligjeve dhe akteve ndërkombëtare.
Ai sot është në duart e prokurorisë italiane. Por opozita vijon të konsumojë përditë energji për një alarm fals, duke e trajtuar rastin sikur i pandehuri u arratis apo u la i lirë dhe jo që iu dorëzua pikërisht drejtësisë italiane.
Organet e akuzës shqiptare nuk i pengon asgjë, përkundrazi kanë të gjitha mjetet ligjore të parashikuara për të bashkëpunuar me ato italiane me qëllim për të marrë dhe për të përfituar çdo informacion që do t’ju nevojitet për efekt hetimi.
Çdo veprim ndryshe nga ekstradimi do të përkthehej dhe nga shteti italian si mungesë vullneti për të bashkëpunuar në luftën kundër krimit të organizuar.
Jam e bindur se nëse nuk do të ishte ekstraduar, kjo opozitë kaq haptas e trembur prej reformës në drejtësi, do të thoshte “nuk i’a dorëzuan antimafias italiane, po e mbajnë këtu për ta mbrojtur me duart e kapura të drejtësisë”…
Kështu që në pamundësinë për të gjetur se cila do të ishte zgjidhja me e mirë për një opozitë që tenton të manipulojë edhe atëherë kur nuk ka, ne thjesht na mbetet të shpjegojmë me durim përmes fjalëve dhe tregojmë me këmbëngulje përmes veprave, se ligjshmëria është busulla e vetme që orienton vendimmarrjen tonë.
