Platforma e mesazheve WhatsApp është rikthyer në internet, pas një ndërprerje që preku përdoruesit në mbarë botën. Meta, e cila zotëron WhatsApp, tha se problemi ishte rregulluar, por nuk dha një arsye për ndërprerjen. Njerëzit që përpiqeshin të dërgonin dhe të merrnin mesazhe në WhatsApp, i cili ka rreth dy miliardë përdorues globalisht, filluan të raportojnë probleme pak para orës 08:00.
Më shumë se 12.000 raporte u postuan brenda gjysmë ore, sipas faqes së internetit të statusit të shërbimit Down Detector.
Megjithatë, rreth orës 10:00 shërbimi u kthye për shumë përdorues.
Eksperti IT, Tomi Kallanxhi thotë se rënia e shërbimit të aplikacionit WhatsApp, mund të ketë lidhje edhe me një sulm kibernetik. Në një intervistë për “Euronews Albania”, Kallanxhi u shpreh se sipas një njoftimi të një ndër kompanive më të mëdha në botë për sigurinë kibernetike, janë sulmuar kibernetikisht serverat e WhatsApp në Evropë.
“Ende nuk dihet zyrtarisht se çfarë mund ta ketë shkaktuar, ndonjë bug, upgrade të serverave apo funksionalitet i ri. Flitet që mund të ketë qenë një sulm kibernetik, në një nga serverat e WhatsApp në Evropë.
Ka qenë Eset, një nga kompanitë më të mëdha në botë për sigurinë kibernetike, ka deklaruar që ka qenë një sulm kibernetik në serverat e Whastapp në Evropë. Asgjë nuk ruhet në asnjë server të WhatsApp. Edhe nëse do hyjnë hakerat, maksimumi do ndalojnë së funksionuari platformën dhe jo të marrë mesazhet brenda”, theksoi ai.
Në një deklaratë Meta tha se problemi ishte zgjidhur. “Ne e dimë se njerëzit kishin probleme me dërgimin e mesazheve në WhatsApp sot”, thuhet në deklaratë.
“Ne e kemi rregulluar problemin dhe kërkojmë ndjesë për çdo shqetësim”. Ndërsa WhatsApp përjetoi vështirësi, shumë njerëz u ankuan në mediat sociale se nuk mund të dërgonin ose merrnin mesazhe.
