Dekani i shkollës nacionale për medicinë tropikale pranë Fakultetit të Mjekësisë Baylor, Peter Hotez, ka paralajmëruar se katër deri në pesë muajt e ardhshëm do të mund të ishin më të rëndit gjatë pandemisë Covid-19.
Kjo sipas tij, sepse më shumë se gjysma e shteteve amerikane tashmë janë duke raportuar për rritje të numrit të rasteve të reja, shkruan MSNBC.
“Katër apo pesë muajt e ardhshëm janë vendimtare, kur edhe do të hyjmë ndoshta në periudhën më të vështirë të kësaj epidemie. Sado e vështirë të jetë, së shpejti do të përkeqësohet”, tha Hotez.
Ai rekomandon formimin e njësisë së miqve apo anëtarëve për muajt e ardhshëm, me qëllim që të shmanget përhapja e mëtejme e COVID-19.
Hotez beson se mund të shkohet deri te dyfishimi i numrit të vdekurve, duke theksuar se bëhet fjalë për gjëra të vështira.
