Në vendin tonë tregtohet mish jo i sigurt, i cili vë në rrezik shëndetin e qytetarëve.
Eksperti i sigurisë ushqimore Dritan Laçi, shprehet se ekzistojnë shumë probleme, si matrikullimi dhe identifikimi i kafshëve, deri te transporti i tyre në thertore, apo dhe procesi i therjes dhe magazinimit të mishit.
Respektimi i këtyre hallkave, duke përfshirë dhe kohën e magazinimit të mishit në ambiente frigoriferike është parësor për të patur një mish sa më të sigurt dhe cilësor.
“Magazinimi në ambiente frigoriferike menjëherë pas therjes është i nevojshëm për të patur cilësi të mirë të mishit. Më pas ai duhet lënë 24-48 orë para se të shitet”, thotë Laçi, transmeton Klan Plus.
Një tjetër shqetësim është mostrajtimi i mbetjeve që vijnë nga therja e kafshëve, të cilat hidhen nëpër lumenj, duke u bërë burim infeksionesh dhe sëmundjesh për qytetarët:
“Mbetjet që vijnë si pasojë e therjes së kafshëve nuk u bëhet asnjë lloj trajtimi. Në këtë pjesë jemi në nivelin zero. Mbetjet hidhen nëpër përrenj apo lumenj. duke u bërë burim infeksionesh dhe sëmundjesh”.
