Prej tre javësh Franca është përfshirë nga protesta të dhunshme. Policia tha se të paktën 8,000 persona protestuan sot në Paris. Në njoftimin zyrtar policia deklaron se qindra prej protestuesve janë arrestuar pas përleshjeve me forcat e rendit. Francezët protestojnë kundër taksave të larta dhe kostos së lartë të jetesës në vend.
Protesta të ngjashme janë zhvilluar edhe në Belgjikë dhe Holandë. Të paktën për protestat e Parisit kemi fakte që ka edhe protestues shqiptarë.
Tirana Today ka siguruar pamje ekskluzive të shqiptarëve që protestojnë në Paris. Duke mbuluar fytyrën për shkak të arrestimeve, njëri prej shqiptarëve protestues ka nxjerrë flamurin kuqezi dhe e ka hedhur krahëve duke marshuar në protestë.
Edhe në Tiranë prej 4 ditësh studentët janë në protestë dhe arsyeja e revoltës së tyre fillimisht ishte ekonomike, por që tashmë është përkthyer në një sërë kërkesash ndaj qeverisë jo vetëm ekonomike.
Një erë e re protestash po frynë në Europë këtë dhjetor. Shqiptarët që protestojnë në Paris janë në mbështetje të protestës së studentëve tanë që protestojnë në Tiranë.
Personi që ka filmuar videon, i shkruan Tirana Today se të gjithë shqiptarët që po protestojnë në Paris janë në mbështetje të plotë të gjithë studentëve që protestojnë në Tiranë duke i inkurajuar që të mos ndalin protestat e tyre. TIRANA TODAY
