Elez Gjoza ka dhënë dorëheqjen nga posti i presidentit të Federatës së Peshëngritjes, pas skandalit të dopingut që -përfshiu kampionen e botës, Romela Begajn. Edhe pse janë thjeshtë dyshime, pasi duhet kryer edhe “Testi B” për tu verifikuar përfundimisht, Gjoza ka vendosur që të lejë detyrën pasi është një rast i përsëritur. Por bindja e tij për këtë çështje është se Romela është e pastër dhe ai personalisht do të kujdeset me ndihma financiare apo çfarëdo që ti shkojë deri në fund.
I kontaktuar nga TiranaToday, Gjoza u shpreh se edhe duke mos qenë president ai do të vazhdojë të jetë pranë Federatës për ti ndihmuar si sponsor.
1- Ishit plotësisht i bindur që Romela është e pastër dhe tani jepni dorëheqjen. Pse ky vendim?
Jam shprehur kohë më parë se në qoftë se do të ketë edhe një përsëritje të këtyre rasteve, ku sportistët dyshohen të kenë përdorur barna të palejuar do të jap dorëheqjen. Jam një President i përgjegjshëm dhe këtë veprim e quaj s një akt moral. Por ju rikujtoj që Romela është 100% e pastër dhe ne do ti shkojmë deri në fund kësaj çështje.
2- Si mund ta ndihmoni Romelën duke mos qenë President i Federatë së Peshëngritjes?
Që ti shkojmë deri në fund këtij problemi nuk është e nevojshme që unë të jem president. Jam një biznesmen dhe do të sponsorizoj të gjitha etapat që të dalë në dritë e vërteta e Romelës dhe të ruaj titullin kampione Bote.
Kur Romela konkurroi dhe u shpall kampione ishte rreth 58kg, ndërsa tani pesha e saj ka shkuar 69kg, kjo do të thotë që ajo tani mund të ngrejë ndoshta 20 kg më shumë. Është çmenduri pasi një sportist që u diagnostikua me përdorimin e asaj substance, ta përdorë sërish në harkun e dy viteve. Romela ka marrë një dietë perfekt dhe ne jemi shumë të sigurt që është e pastër. Madje trajneri i saj edhe kafen ia merrte nga jashtë për të evituar çdo mundësi.
3- Nëse Romela pas testit B del e pastër do të riktheheni në postin e Presidentit të Federatës së Basketbollit?
Që të ndihmosh këta sportistë nuk është e nevojshme të jesh president, unë jam një qytetarë dhe bëra një akt moral, ashtu e ndjeva ashtu bëra. Por do të jem gjithmonë pranë Federatës edhe pse jo president. Do ti ndihmoj ata si sponsor, do të kenë gjithmonë mbështetjen time.
