Aktori Arben Derhemi dhe njëherësh një ndër zërat kryesorë në mbrojtjen e Teatrit Kombëtar ka hedhur poshtë pretendimet për një marrëveshje me kreun e Bashkisë së Tiranës lidhur me shembjen ose jo të Teatrit Kombëtar, duke e cilësuar të gjithën si farsë.
Në një prononcim për “Tirana Today”, Derhemi shpjegon se në takimin e tij me Veliajn, ku ishin të pranishëm regjisori Altin Basha dhe aktori Alfred Trebicka nuk është arritur asnjë marrëveshje që cenon territorin e Teatrit Kombëtar.
Ai shton se Veliaj pranoi që të mos prekë asnjë centimetër të Teatrit Kombëtar dhe kërkesa tjetër e artistëve ka qenë për një konkurs ndërkombëtar lidhur me Teatrin e ri Kombëtar dhe për të qenë pjesë e Komisionit që do të ngrihet për Teatrin.
https://tiranatoday.com/veliaj-korrupton-artistet-derhemi-e-nxjerr-blof/
Më herët Veliaj postoi në rrjetin e tij social në Facebook, një foto përkrah aktorëve Arben Derhemi, Alfred Trebicka dhe regjisorit Altin Basha, duke e cilësuar gjithë takimin midis tyre si një marrëveshje për Teatrin e ri Kombëtar. Por, e gjitha kjo është hedhur poshtë nga vetë Derhemi i pranishëm në takimin me kryebashkiakun.
Z. Derhemi, a keni arritur një marrëveshje me kreun e Bashkisë së Tiranës, Erion Veliaj lidhur me Teatrin Kombëtar?
Nuk kemi asnjë negociatë. E gjitha kjo është një farsë. Nuk kemi bërë asnjë marrëveshje. Folëm me z. Veliaj. Veliaj pranoi që të mos prekë asnjë centimetër të Teatrit Kombëtar. Të ketë dy prej nesh në Komisionin që do të ngrihet për Teatrin Kombëtar dhe ne i kërkuam me patjetër që të bëhet konkurs ndërkombëtar për Teatrin.
A do të ndërtohen kulla mbi Teatrin Kombëtar?
Nuk merrem me këtë punë. Ndërtim të kullave në Teatrin Kombëtar nuk do të ketë.
A ka gjetur miratimin e aktorëve të tjerë ky takim i juaji apo “marrëveshje” siç e ka cilësuar Veliaj?
Ne nuk kemi folur me aktorë të tjerë. Ne kemi folur vetëm me Veliajn, shumë aktorë janë me këtë pjesë, ndërsa për të tjerët të shohim. Mosprekja e Teatrit Kombëtar nuk është thjesht një pikëpamje.
TIRANA TODAY
