“Sytë” e medias sot ishin në protestën e opozitës, e cila nisi në orën 12:00 në bulevardin “Dëshmorët e Kombit”.
Por, në këtë protestë u vu re diçka që s’kishte ndodhur më parë: në tubim mungonin flamujt e Partisë Demokratike.
Por, çfarë mesazhi përcolli kreu i PD-së me këtë zgjedhje? Mos kemi të bëjmë me një mesazh drejtuar kritikëve të Bashës, se me ardhjen e së ashtuquajturës Republika e Re, do të kemi edhe një Parti Demokratike të re?
Në fakt, ky është mendimi i parë që të shkon në mendje, pas “shpërthimit” të Bregut, Selamit dhe Topallit ndaj strategjisë së Bashës me bllokimin e zgjedhjeve të 18 qershorit.
Burime nga selia blu, janë shprehur për Tirana Today se në fakt mungesa e flamujve të PD-së ishte një zgjedhje e Bashës për të treguar se protesta e sotme ishte një protestë qytetare, një protestë e të gjithë shqiptarëve, pa dallim kahu politik.
Megjithatë, duket se këtë “rregull” e kanë thyer aleatët e Bashës, si Partia Republikane dhe Aleanca Kuq e Zi, flamujt e të cilave kanë qenë të pranishme në protestë.
Megjithatë, duhet theksuar se pak pa përfunduar fjala e Bashës, flamujt e Partisë Republikane dhe të Aleancës Kuq e Zi janë hequr nga protesta./ TIRANA TODAY
